បណ្ឌិត សុខ ទូច ចោទជាសំណួរថា ហេតុអ្វីស្ថាប័នពាក់ព័ន្ធថាខ្មែរអស់ត្រីហូប?
ឌឹ ខេមបូឌា ដេលីបរិស្ថាន
មន្ត្រីជាន់ខ្ពស់នៃរាជបណ្ឌិត្យសភាកម្ពុជា បង្ហាញការភ្ញាក់ផ្អើលក្រោយពីក្រសួងកសិកម្មកម្ពុជា បានប្រកាសថា ប្រទេសកម្ពុជាខ្វះត្រីដើម្បីផ្គត់ផ្គង់ទីផ្សារក្នុងស្រុក។
ប្រធានរាជបណ្ឌិត្យសភាកម្ពុជា បណ្ឌិត សុខ ទូច បានលើកឡើងនៅលើបណ្ដាញសង្គមរបស់លោកនៅថ្ងៃទី១៧ ខែមិថុនា ដោយចោទជាសំណួរថា ហេតុអ្វីគ្រាន់តែពលរដ្ឋវៀតណាមឡើងគោក និងលែងចិញ្ចឹមត្រី បែរជាស្ថាប័នពាក់ព័ន្ធនៅកម្ពុជាអះអាងថា កម្ពុជាខ្វះត្រីហូប ខណៈប្រទេសជិតខាងមានប្រជាជនច្រើនជាងកម្ពុជា មានពូជត្រីតិចជាងកម្ពុជា ហើយនៅតែមានលទ្ធភាពដឹកត្រីចូលមកកម្ពុជាថែមទៀត?
លោកលើកឡើងទៀតថា បើឡាវខ្វះត្រីហូប ទើបមិនចម្លែក តែបើខ្មែរថាខ្វះត្រីទទួលទាន វាដូចជាចម្លែកអស្ចារ្យណាស់ ព្រោះខ្មែរមានទន្លេមេគង្គ បឹងទន្លេសាប និងស្ទឹង ព្រែក បឹង អូរជាច្រើនប្រៀបដូចសរសៃឈាម ហើយថែមទាំងមានសមុទ្រជាប្រភពត្រីទឹកប្រៃទៀត តែអស់ត្រីហូប ប្រហែលមកពីមូលហេតុមួយចំនួន។
លោកបានលើកឡើងចំនួនទាំងនោះថា៖
- ទី១ មិនបានគណនាពីតម្រូវការទីផ្សារនៅក្នុងស្រុក ដែលប្រហែលមកពីខ្វះអ្នកគិតចំណោទហើយ
- ទី២ ប្រហែលជាមកពីព្រៃលិចទឹកត្រូវបានបំផ្លាញអស់
- ទី៣ ប្រហែលមកពីបឹងត្រូវបានលុប
- ទី៤ ប្រហែលមកពីតំបន់នេសាទ និងតំបន់ចិញ្ចឹមត្រី មិនត្រូវបានរៀបចំទៅតាមសក្ដានុពល តែបែរជាត្រូវបានលុបដោយសារតម្លៃទីផ្សារដីឡើងខ្ពស់ នាំគ្នាលុបបឹង ស្ទឹង អូរ យកទៅលក់។
- ទី៥ គឺមិនបានចងជាសហគមន៍ ដើម្បីឱ្យការផលិតឆ្លើយតបទៅនឹងតម្រូវការទីផ្សារ
- ទី៦ កម្ពុជាមិនបានកែច្នៃវត្ថុធាតុដើមក្នុងស្រុកដែលមាន ឱ្យទៅជាចំណីរបស់សត្វ ឬមនុស្ស តែកម្ពុជាបែរជាទិញចំណីស្រាប់ពីប្រទេសជិតខាងមកឱ្យសត្វ ដែលធ្វើឱ្យថ្លៃដើមផលិតខ្ពស់មិនអាចប្រកួតប្រជែងបាន
- ទី៧ បើត្រីដែលចិញ្ចឹមបានមានអតិផរណា យើងអាចកែច្នៃត្រីទៅជាផលិតផលជាច្រើនតាមលក្ខណៈប្រពៃណី មិនបាច់ប្រើវិទ្យាសាស្ត្រទេ ដូចជា ផ្អក ប្រហុក ត្រីងៀត ត្រីឆ្អើរ ទោះជាមិនបាច់ធ្វើត្រីខកំប៉ុង ក៏ត្រីគ្មានអតិផរណាដែរ។
ក្រោយពេលដែលសាលារាជធានីភ្នំពេញបានប្រកាសបណ្ដេញជនជាតិវៀតណាម ដែលកំពុងរស់នៅ និងចិញ្ចឹមត្រីតាមដងទន្លេក្នុងភូមិសាស្ត្ររាជធានីភ្នំពេញមកនោះ គឺមានអ្នកប្រើប្រាស់បណ្ដាញសង្គមនិយាយហាក់ចំអកផង និងមើលងាយខ្មែរផងថា បើដេញវៀតណាម ប្រាកដជាខ្មែរអត់ត្រីហូបមិនខាន។
ក្រោយការជជែករបស់អ្នកប្រើប្រាស់បណ្ដាញសង្គម គឺកាលពីថ្ងៃទី១៥ ខែមិថុនា ក្រសួងកសិកម្ម រុក្ខាប្រមាញ់ និងនេសាទ បានសារភាពតាមរយៈសេចក្តីប្រកាសព័ត៌មានថា ការផ្គត់ផ្គង់ត្រីនៅកម្ពុជានៅតែជួបបញ្ហាប្រឈម ដោយមិនទាន់អាចដោះស្រាយបាននៅឡើយ។
ក្រសួងកសិកម្ម លើកមូលហេតុចម្បងៗថា ការជួបបញ្ហាប្រឈមក្នុងការផ្គត់ផ្គង់ត្រីនៅកម្ពុជា គឺ៖
- បណ្តាលមកពីការថមថយត្រីពីធម្មជាតិ
- ការមានបដិបក្ខក្នុងការគ្រប់គ្រងទីផ្សារត្រីនៅកម្ពុជា
- និងការប្រកួតប្រជែងទីផ្សារត្រីជាដើម។
ផ្ទុយពីការលើកឡើងរបស់ក្រសួងកសិកម្ម រុក្ខាប្រមាញ់ និងនេសាទ សមាគមវារីវប្បករនៅកម្ពុជា ធ្លាប់បានលើកឡើងថា កសិករកម្ពុជាដែលចិញ្ចឹមត្រីសឹងតែលែងហ៊ានចិញ្ចឹមត្រីទៅហើយ ដោយសារតែផលិតផលប្រមូលបានហើយ ប៉ុន្តែខ្វះទីផ្សារ និងដោយសារការនាំចូលត្រីពីក្រៅប្រទេស ជាពិសេសមកពីប្រទេសវៀតណាម ដែលមានតម្លៃថោកជាដើម។
នៅថ្ងៃទី១៧ ខែមិថុនា សមាគមវារីវប្បករនៅកម្ពុជា បានលើកឡើងក្នុងបណ្ដាញសង្គមរបស់ខ្លួនថា អ្នកចិញ្ចឹមត្រីកំពុងមានបញ្ហាប្រឈមធំ គឺតម្លៃត្រីនៅស្រះធ្លាក់ចុះទាប ហើយកាន់តែបន្តធ្លាក់ចុះ ដែលពួកគាត់បានរងការខាតបង់ និងកំពុងប្រឈមមុខនឹងការខាតបង់ធំ។ អ្នកចិញ្ចឹមត្រីអាចផលិតបានត្រីច្រើនប្រភេទសម្រាប់ទីផ្សារ ប៉ុន្តែលំបាកចេញទៅទីផ្សារក្នុងបច្ចុប្បន្ននេះ។
សមាគមវារីវប្បករនៅកម្ពុជា បានអំពាវនាវដល់ស្ថាប័នពាក់ព័ន្ធ ជួយខ្នះខ្នែងដោះស្រាយបញ្ហាខាងទីផ្សារដល់ពួកគាត់ផង និងសូមបងប្អូនជនរួមជាតិខ្មែរជួយគាំទ្រផលិតផលជលផលខ្មែរ៕